លោក ត្រាំ បញ្ជាឱ្យស្ថាប័នរដ្ឋឈប់ប្រើ Anthropic ហើយងាកទៅរក OpenAI ជំនួសវិញ

          

(បរទេស)៖ ក្រសួងរតនាគារជាតិ, ក្រសួងការបរទេស និងទីភ្នាក់ងារលំនៅឋានសហព័ន្ធរបស់សហរដ្ឋអាមេរិក កំពុងបញ្ឈប់រាល់ការប្រើប្រាស់កម្មវិធីរបស់ក្រុមហ៊ុន Anthropic។ ក្រសួងការបរទេសបានបញ្ជាក់ថា ខ្លួននឹងប្តូរទៅប្រើប្រាស់កម្មវិធីក្រុមហ៊ុនគូប្រជែងគឺ OpenAI វិញ បន្ទាប់ពីប្រធានាធិបតី ដូណាល់ ត្រាំ (Donald Trump) បានចេញបញ្ជាឱ្យស្ថាប័នរដ្ឋាភិបាលបោះបង់ចោលបច្ចេកវិទ្យារបស់ Anthropic រួមទាំងកម្មវិធី Claude ជាដើម។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី០៣ ខែមីនា ឆ្នាំ២០២៦។

កាលពីថ្ងៃសុក្រសប្តាហ៍មុន លោក Trump បានបង្គាប់ឱ្យរដ្ឋាភិបាលបញ្ឈប់ការងារជាមួយ Anthropic ហើយក្រសួងការពារជាតិ (Pentagon) បានលើកឡើងថា ខ្លួននឹងប្រកាសចាត់ទុកក្រុមហ៊ុន AI ថ្មីថ្មោងមួយនេះថាជា «ហានិភ័យដល់ខ្សែសង្វាក់ផ្គត់ផ្គង់»។ នេះគឺជាការវាយប្រហារដ៏ធំមួយចំពោះមន្ទីរពិសោធន៍បញ្ញាសិប្បនិម្មិត (AI lab) មួយនេះ បន្ទាប់ពីមានការប្រឈមមុខដាក់គ្នាយ៉ាងខ្លាំងក្លាពាក់ព័ន្ធនឹងបញ្ហា «របាំងការពារសុវត្ថិភាពបច្ចេកវិទ្យា» (technology guardrails)។

រដ្ឋមន្ត្រីក្រសួងរតនាគារជាតិអាមេរិក លោក Scott Bessent បានបង្ហោះលើបណ្តាញសង្គម X កាលពីថ្ងៃច័ន្ទថា ក្រសួងនឹងបញ្ចប់រាល់ការប្រើប្រាស់ផលិតផល Anthropic រួមទាំង Claude ផងដែរ។ នាយកក្រុមហ៊ុន លោក William Pulte ក៏បានប្រកាសតាមរយៈ X ដែរថា នាយកដ្ឋានរបស់លោក រួមទាំងទីភ្នាក់ងារបញ្ចាំ Fannie Mae និង Freddie Mac កំពុងបញ្ចប់ការប្រើប្រាស់ផលិតផល Anthropic ទាំងអស់។ យោងតាមកំណត់ហេតុផ្ទៃក្នុងដែល Reuters បានឃើញ ក្រសួងការបរទេសអាមេរិកកំពុងប្តូរម៉ូដែល AI ដែលដំណើរការក្នុងកម្មវិធី Chatbot ផ្ទាល់ខ្លួនឈ្មោះ StateChat ពី Anthropic ទៅកាន់ OpenAI វិញ។ កំណត់ហេតុនោះបានបញ្ជាក់ថា៖ «សម្រាប់ពេលនេះ StateChat នឹងប្រើប្រាស់ GPT 4.1 របស់ OpenAI»។ ជុំវិញព័ត៌មាននេះ ក្រសួងការបរទេសអាមេរិកមិនបានឆ្លើយតបភ្លាមៗនូវសារដែលស្នើសុំការអត្ថាធិប្បាយនោះទេ។

លោក Trump បានមានប្រសាសន៍ថា នឹងមានរយៈពេល ៦ខែសម្រាប់ការផ្លាស់ប្តូរ (Phase-out) សម្រាប់ក្រសួងការពារជាតិ និងភ្នាក់ងារដទៃទៀតដែលកំពុងប្រើប្រាស់ផលិតផលរបស់ Anthropic។ សកម្មភាពទាំងនេះតំណាងឱ្យការស្តីបន្ទោសយ៉ាងធ្ងន់ធ្ងរមិនធ្លាប់មានពីសំណាក់ទីក្រុងវ៉ាស៊ីនតោន ប្រឆាំងនឹងក្រុមហ៊ុនឈានមុខគេមួយ ដែលធ្លាប់បានជួយឱ្យសហរដ្ឋអាមេរិកនាំមុខលើវិស័យ AI សម្រាប់សន្តិសុខជាតិ។ ពេលនេះ Anthropic អាចនឹងក្លាយជា «អ្នកក្រៅ» (Pariah) ដែលជាឋានៈមួយកាលពីមុនត្រូវបានបម្រុងទុកសម្រាប់តែអ្នកផ្គត់ផ្គង់ដែលជាសត្រូវប៉ុណ្ណោះ។

ស្របពេលជាមួយគ្នានេះ កាលពីយប់ថ្ងៃសុក្រកន្លងទៅ ក្រុមហ៊ុនគូប្រជែង OpenAI បានប្រកាសពីកិច្ចព្រមព្រៀងផ្ទាល់ខ្លួន ក្នុងការដាក់ពង្រាយបច្ចេកវិទ្យារបស់ខ្លួននៅក្នុងបណ្តាញសម្ងាត់របស់ក្រសួងការពារជាតិអាមេរិក។ នេះគឺជាការផ្លាស់ប្តូរទិសដៅនយោបាយបច្ចេកវិទ្យាដ៏ធំមួយ ដែលបង្ហាញថា រដ្ឋបាលថ្មីចង់បានប្រព័ន្ធ AI ដែលមានភាពបត់បែនជាងមុន និងកាត់បន្ថយឥទ្ធិពលរបស់ក្រុមហ៊ុនណាដែលពួកគេយល់ថាមានការរឹតត្បិតខ្លាំងពេក៕